Sud-Ouest Généalogie

Cartes postales et photos anciennes, histoire locale, généalogie, ...

Pactes du mariage de Jean de Habaas et Margueritte de la Fargue Cassabé

[La transcription peut comporter des erreurs]


Au nom de Dieu

Sachent tous presentz & advenir que pactes & Convention De Mariage ont esté faitz & passes ce Jourd'huy plus bas escript soubz Le bon plaisir de Dieu Entre noble Jean de habaas abbé Descos & sieur du cabé de La bastide, Dune part et Damoiselle Margueritte De la fargue cassabé Dautre comme sen suit, sçavoir est que led. sieur de habaas ascisté & authorisé de nobles Jean de habaas capitaine dans Le Regiment de normandie son frere, Pierre de Pefaur abbé de puyo & Ramous & Jean de pefau Lapadu, ses oncles Estienne de Mayendie barran son oncle par alliance & Arnaud de Balin sieur de cruchague son cousin a promis se bailler pour Mary & fucteur espoux a lad. Damoiselle de La fargue Laquelle reciproquement de son costé asçistée & authorisée de noble Daniel de La fargue seigneur de Cassabé et De Lassalle & abbé dud. Lieu son pere, De Dame Elisabet de Jasses sa mere, nobles francois & henry de la fargue ses freres, et de Me Jean de la fargue adat au parlement de navarre son oncle, et de Jaques de Collomme sieur de la barthe son oncle par alliance De nobles Jean de freche curé de st martin de sallies De paul de Bachoué seigneur de Bideren ses cousins, et De Ladvis De Messire Jean seigneur & baron de Jasses & autres terres & seigneuries conseilher du Roy au parlement de navarre son oncle, De Messieurs Mes antoine de Camanere coner du Roy, et Me ordinaire en la Chambre de Comptes de navarre, françois Dandoinx seigneur De Camtort coner du Roy en ses conseilhs & son proscureur genal en lad. Chambre et de noble Jean DanDichon sieur de la fitte de Moneing ses oncles par alliance, et De Messire Jaques de Jasses baron de nabas et autres Lieux son cousin germain a promis se donner pour femme et Legitime espouse audit sieur de habaas, et les Deux promis faire benir & Consumer Leur Mariage en l'Eglize P. R. Dont Ilz font profession un mois apres que Lune partie en requerra lautre ayant Esté fiancesLheure presente, et pour support & ayde dud. Mariage Led. seigneur de Cassabe pere a promis bailler et payer aud. sieur de habaas pour la Dot & portion de legitime qui peut competer a lad. Damelle de la fargue sa filhe sur les biens paternels & maternels La somme de Dix Mille livres Payables, sçavoir Est quattre Mille Livres le jour de nopces trois mille livres Deux ans apres, et les trois mille livres restantes Deux ans apres, Le second payement avec Les Intrestz au Denier vingt puis Lecheance des termes Des payements a chascun desquels led. sieur de habaas sera thenu Doctroyer quittance, Et au Dernier & final carthe de tournadot ou Reversion suivant Lusage de la province Et en outtre Led. seigneur de Cassabé et Lad. Dame de Jasses abilheront & Donneront du linge a leur Discrition a lad. Damoiselle de la fargue leur filhe convenu Entre Lesd. fucteurs Maries qu'ilz Instituent pour leurs herictiers De leurs biens apres Leur Dessez Les enfans qui proviendront de leur Mariage, se Reservant eux neaumoinx Le Droit et Liberté de pouvoir choisir tel ou tels de leurs enfans pour leurs herictiers que bon & advis leur semblera, sans Distinction de sexe ny ordre de primoginuture, Mesmes de se transferer lun a Lautre sy bon leur semble par testement ou autrement La faculté de ce chois, outtre quoy a Esté convenu Entre lesd. fucteurs conjoinctz que Les biens qu'ilz aquerront constant leur Mariage seront partages par Moytié Entr'eux Et nonobstant Linstitution sy Dessus rapportee chascun en Droit Den Disposer ainsy qu'il verra bon estre, Et finallement qu'en cas de preDesses dud. sieur de habaas a lad. Damoiselle de la fargue, Lad. Damoiselle gaignera par forme de guain nuptial ou agensement sur Les biens Dud. sieur de habaas enfans ou sans enfans La somme de quattre Mille Livres, et led. sieur de habaas en cas de predesses de lad. damelle de la fargue gaignera sur lad. somme de Dix Mille livres a Elle constituée par led. seigneur de Cassabe son pere enfans ou sans Enfans La somme De Deux Mille livres, se Reservant Lesd. fucteurs Maries chascun Dheux, La disposition Desd. agensementz ainsy qu'ilz verront estre affaire, Et Pour Lobservation De ce dessus chascune Des parties en droit soy ont obligé exa sousmis exa Constitué exa renonce exa Juré exa a Cassabé Le troisiesme de May mille six Centz septante cincq presentz & tesmoinx Me Robert Molia Docteur en theologie et curé de Cassabé Me guabriel de trepsacq Ministre de la bastide & moy pierre de st martin nore publicq Dud. lieu de Cassabé qui exa

habas, Marguerite de Lafargue, Lafargue cassave, Jasses, Jasses, Camanere, elisabet de jasses, habas, D'Andoyns, Lasalle Cassabe, J Andichon, H. de Lafargue, Jasses, Pefaur, Maiendie, A valin, J. DeLafargue, Bachoue Bideren, colomme labarthe, de fraiche, Trepsac Ministre pnt, R. Molia ptre pnt
Sainctmartin nore



du 3 de may 1675
Pactes Et acortz de Mariage dentre noble Jean de habas abbé Descos et sieur du Cabé de Labastide Et Demoiselle Margueritte de Lafargue
  • de CASAMAJOR Jacques
  • Jacques de Jasses, seigneur baron de Nabas et autres places
  • ( - >1680 )
  • présent
  • de CASAMAJOR Jean
  • seigneur et baron de Jasses et autres lieux
  • ( - >1682 Jasses ? )
  • présent
  • de HABAS Jean
  • abbé d'Escos, sieur du Cabé
  • ( - >1682 Labastide-Villefranche ? )
  • de LAFARGUE Daniel
  • seigneur de Cassaber et de Lassalle, abbé laïque de Cassaber
  • ( - >1682 Carresse-Cassaber ? )
  • présent