Comme soit ainsy Que Par Contract obligatoire du neufviesme Septembre mil six Cens deux retenu par duclerc nore Royal feu noble Jean de Labadie escuyer en son vivant sieur de la maison noble de labadie du pnt lieu De Guissen eust confessé estre debiteur envers Pierre de litzeratze aussy escuyer de la somme de mil livres pour les causes Contenues aud. Contract Et nayant satisfaict au payement de ladicte somme au terme porté par ledict Contract tant feue Jeanne duvignau demoiselle veuve dudict feu de liseratze, que noble Anthonin de liseratze aussy escuyer sieur de Laroque son filz et heritier auroict faict faire quatre divers commandemens audict feu sieur de Labadie Ensemble a feue noble Pierre de Labadie son filz par daguerre sergent Royal le treiziesme mars mil six Cens vingt le sixiesme Juillet mil six Cens vingt huict, Le Cinquiesme avril mil six Cens trente deux et neufviesme avril mil six Cens trente six, Et ensuitte le douziesme Aoust mil six cens quarente deux Le mesme sieur de liseratze auroict faict prendre a saizie & [] des biens delaissés par ledict feu sieur de Labadie Et Au regisme diceux faict establir et depputer Commissaires Arnaud De Caumont dict doutchouette Bernard de lafite dict de herpilh Et Jean petit De Garat dict darancette Ainsy que Resulte par ledict Procés verbal signe dudict daguerre sergent Royal que soit ainsy que mariage auroict esté contracté entre ledict sieur de liseratze et feue demoiselle héléne de Labadie Et que par le Contract sur ce passé le vingt sixiesme mars mil six Cens trente un Retenu par Morel notaire Royal Entre autres Chozes demoiselle Gracy De Lasalle et ledict feu noble Jean de labadie eussent constitué en dot a ladicte helene fille de ladicte demoiselle de lasalle Et soeur dudict feu noble Pierre de Labadie la somme de quatre mil livres en Argent Lesquels Ou partie dicelles auroient esté payées Audict sieur De Liseratze Ou quoy que soict promis et De payer a sa descharge aux sieurs De Castenoletz Pierre [darrosine?] Jean de busquet et a la dame religieuse De balin a la reserve touteffoix De la somme de quatre Cens neuf livres dheues de tout reste audict sieur Laroque, Despuis lequel Contract de mariage ledict feu noble pierre de labadie estant deceddé par son testement du dix neufviesme Janvier mil six Cens trente neuf auroict laissé & legué a ladicte feue héléne sa soeur la somme de mil livres laquelle héléne estant aussy deceddéé par son testement auroict institué heritier ledict sieur de laroque son mary, Lequel desirant retirer payement des susdictes sommes a luy dheues Ensemble des Interestz dicelle et despens faictz affaute de payement desd. sommes Et voullant former action en Reduction de comptes contre lesdictz commissaires Demoiselle Margueritte de Crutchette veuve dudict feu pierre de labadie et administraresse de Leurs Enfans quy a [] lesdictz soinctz desdictz biens saizis a declairé audict sieur de laroque voulloir satisfaire au payement des sommes a luy dheues Et ayant procedé à la liquidaon desdictz Interestz & despens cest trouve linterest desdictes mil livres Contenues en la susdite Obligation dudict Jour neufviesme decembre mil six Cens deux a la somme de mil livres Et linterest desdictes quatre Cens neuf livres du reste du dot la somme de deux Cens dix livres Et lesdictz despens de Saizie & Commandemens la somme de quinze livres Revenant toutes lesd. sommes en bloc a la somme de trois mil six Cens vingt cinq livres En telle sorte quil ne reste que satisfaire par ladicte demoyselle au payement desd. sommes la quelle offre faire tout Presentement
Par quoy est Il que Auiourdhuy dixhuictiesme du mois de Decembre mil six Cens quarente trois Avant midy En la Comté De Guissen Et en ladicte maison noble de labadie Pardevant Moy Notaire Royal soubzné et en la presence des tesmoings baz nomméz a esté en sa personne ledict sieur Anthonin de liseratze sieur de la Roque habitant de la souveraineté de Bidache Lequel de sa franche volonté a cogneu & Confesse avoir receu presentement de lad. demoyselle Margueritte De Crutchette veuve dudict feu noble Pierre de labadie ladicte somme de trois mil six Cens vingt Cinq livres tz tant pour le principal des susdictes sommes Interestz dicelle Que despens faictz affaute de payement audict sieur de la Rocque dheues Lequel susd. payement a esté faict par les mains de Noble Bertrand de lissalde sieur du sauldan a ce pnt & Delivrant ladicte somme a la requisition et priere de ladicte demoyselle de Crutchette En pistolles dor, Pieces de Cinquante huict solz de poidz Et de cours et des propres deniers dudict sieur de lissalde ainsy que tant luy que ladicte demoyselle ont declairé, En consequance de laquelle declairaon ladicte demoiselle de Crutchette Ensemble ledict sieur de laroque Ont subrogé & subrogent par ces pns ledict sieur de lissalde au lieu Droict place et hipoteque dudict sieur De liseratze, Moyennant lequel payement ledict sieur de liseratze a deschargé et descharge lesd. Commissaires Et acquitte et acquitte ladicte demoiselle de la susd. somme et gennerallement de toutes chozes quil pourroit pretendre pour raison de ce dessus Declarant conformement au susdict contract de mariage quil affecte et hipoteque sur tous et chascuns ses biens les susd. quatre mil livres de dot constitué par Icelluy Moyennant ce que lad. demoiselle a promis & sera tenu de rapporter quittance audict sieur de liseratze des sommes que ledict feu sieur de Labadie sestoit chargé payer a sa descharge ausd. savoir de Castenoletz [darrosine?] De busquet et a ladicte Religieuse de Valin Partie de laquelle somme receue presentement par ledict sieur de laroque Il declaire voulloir employer au payement des sommes par luy dheues a Monsieur Le Baron de Lons Comme heritier de la deffunte dame sa mere et quil luy doibt par Contract du [blanc] Janvier mil six Cens quarente un Retenu par brana notaire. Promettant ledict sieur de laroque de tenir bonne a valable la pnt quittance et subrogaon Et ladicte demoyselle de satisfaire au payement desdictes sommes que led. feu sieur de labadie sest chargé payer a la descharge dudict sieur de laroque Et pour tel effect ont Obligé et hipotequé leurs personnes & biens presens & futeurs quilz Ont soubzmis a toutes Cours & rigueurs De Justice et a quy La cognoissance en appartiendra Renoncé a toutes renonciaons de faict et de droict Contraires & prejudiciables Et ainsy lont promis & Juré a Dieu tenir et ny contrevenir ez pnes de mes Arnaud duclercq pbre & curé dudict guissen & Saubat de labayre lieutenant de bayle quy avecq lesdictz sieur & ladicte demoyselle de Crutchette se sont signés a Loriginal des presens De ce faire somméz & requis Par moy Jean Ainsy signé duclerc nore Royal

Extraicte vuidimée & Collaonnée a esté la presente coppie sur [autre] Coppie de son Original Par Nous Notaires Royaux De la ville & citté De Bayonne soubs signés sans y avoir rien adjousté ny diminué Ce requerant sieur Bertrand De labadie escuyer au pouvoir duquel le tout advienne a Bayonne le ventiesme may mil six Cens soixante quatre



18e deceme 1643 Duclerc noe
Quittance de m. de larrocque pour reste du dot de sa femme, dune partie de 1000 lt et dun legat de pareille somme montant le tout a 3625 lt