5e may 1634 casenave note
Engagement de 2 journées terre a esté grand en faveur de bernard de lafitte por 150 lt

Saichent tous que ce Jourdhuy Cinquiesme du mois de May Mil six Cens trente quatre apres Midy En la parroisse de guissen et Maison appellée de hourn pardt Moy Notaire royal soubz signé Et tesmoings bas Nommés a Esté en sa personne Noble pierre de Labadie Escuyer sr dudt Lieu et de garat hant audt guissen Lequel de sa franche Et agreable vollonté a vendeu Et alliené Et par ces pns vend et allienne a pacte de rachapt perpetuel a bernard de lafitte Laboureur hant audt guissen pnt et aceptant scavoir est deux Journés de terre et prairie scitués au Lieu appellé Estegrand quartier de haches Jurisdiction dudt guissen que Confrontent de tous voultz Et Coustés a terre dudt sr vendeur Et autremt ainsy quelles sont Entre Leurs autres plus amples Confrontations avecq Leurs Entretien et Issennt Necessaires franches quites de toutes charges debtes Et ypoteque Excepté de deux solz de fiefz que Ledt achepteur sera tenu Comme a promis payer audt sr vendeur anuellemt et par chascun Jour de Capdan Et autremt Ladte venthe ou Engaigemt a esté faite par Ledt sr vendeur En faveur dudt achepteur pour le pris Et somme de Cent Cinqte Livres tz Laquelle Icelluy sr vendeur a Confessé avoir prins Et receu dudt achapteur presentement devant Moy dt Notaire Et tesmoings En pistoles dor et de poix quartz desceu Et autre Monnoye ayant Cours En ce pais, dont s'est tenu Et tient pour bien Comptant satisfait et payé Et en a acquitté Et acquitte Ledt achepteur En faveur duquel, Ledt sr, cest desmis Et departy desdtes deux Journées de terre L'en a saisy vesty Et Mis En pocession pour la tradduon de la cedde des pns quil Luy a Mis En Main En signé dIcelle Consentent quil En Jouisse doresavant Et fasse Les fruitz siens Mesmes quil En prenne La realle possession par Justice ou autremt Comme bon Luy semblera Luy pnt ou absent et sans Ly appeller Le Constituant pour Cest effect procureur En propre Cause promettant Ledt sr vendeur de tenir bon Ledt Engaigemt audt achepteur Envers Et Contre tous a payne de tous despans domages Et Interetz Et par Mesme Moyen Ledt achepteur a promis Et promet de revendre Ladte terre audt sr de labadie Et les siens a tous temps saisons et a Jamais que requis En sera En luy payant Et remboursant Ladte somme de Cent Cinqte Livres Loyaulx Coutz aumentaons et Mellioraions suivant La Coustume de labourt, Et pour tout Ce dessus tenir Lesdtes parties chascune pour soy ont obligé et hipotequé Leurs personnes Et biens Meubles et Imeubles pns et advenir quilz ont soubzmis a toutes rigeurs de Justice a qui La Cognoissance En appdra ont renoncé a toutes rennonciaions Exeptions Et Moyens a ce dessus preiudiciables Et ainsy l'ont promis Et Juré a dieu Ez presences de bertrand De provenchere sergt ordinaire dudt guissen, Et arnault de laMotte Me charpantier habitans audt guissen tesmoings a ce appellés Ledt sr de labadie Et de provenchere signé a la Cedde Et Non Les autres pour Ne scavoir de ce faire sommés par Moy ainsy signé de Cassenave Notaire royal

Extraict vidimée Et collaonnée a Este La pnte Coppie sur autre Coppie tirée de son original par Nous Notaires royaux de la ville Et Citte de bayonne soubzsignés sans y avoir rien adiousté Ny diminuée Ce requerant Noble bertrand de Labadie Escuyer au pouvoir duquel le tout a demuré a bayonne le Cinquiesme Jour du mois de Juin mil six Cens soixante quatre